Бейнебақылаудың заманауи технологиялары мен бұзушылықтарды тіркеу жүйелері мемлекеттік нөмірлерді жасыруға тырысуды іс жүзінде мағынасыз етеді. Бұл туралы Ақмола облысы полиция департаменті патрульдік полиция ротасының 1-ші взводының командирі Жангелді Әлібеков айтып берді.
Полицейлердің айтуынша, жүргізушілер көбінесе жылдамдықты асырғаны үшін жауапкершілікті болдырмауға, сондай-ақ көліктің шамадан тыс жүктелуіне байланысты бұзушылықтарды жасыру үшін нөмірлерді жасыруға тырысады.
Мәселен, 17 мамырда сағат 21:00 шамасында Астана-Қабанбай батыр – Теміртау автожолының 17-ші шақырымында патрульдік полиция қызметкерлері Shacman маркалы жүк көлігін тоқтатты. Құжаттарды тексеру кезінде инспекторлар ерекше орнатылған нөмірлік белгіге назар аударды.
Егжей-тегжейлі тексеру кезінде нөмірдің артында жүргізушіге қажет болған жағдайда нөмірді қауіпсіздік камералары үшін оқылмайтын етіп түсіруге мүмкіндік беретін, кейін оны тез қалпына келтіретін арнайы трос механизм орнатылғаны анықталды. Жүргізуші бұзушылық фактісін мойындады.
Тағы бір жағдай Астана-Щучинск тас жолының 109 – шы шақырымында тіркелді. Қауіпсіздік камералары мемлекеттік нөмірсіз жүрген Hyundai Sonata көлігін белгіледі. Ақпарат дереу жақын маңдағы патрульдік экипаждарға берілді. Трассаның 108-ші шақырымында көлік тоқтатылып, бұзушылықтың жолы кесілді.
Барлық фактілер бойынша жүргізушілер әкімшілік жауапкершілікке тартылды.
Жыл басынан бері полицейлер жалған немесе жасырын мемлекеттік нөмірлермен байланысты 800-ден астам бұзушылық тіркеді.
Полицейлер қазіргі заманғы бақылау жүйелері мұндай бұзушылықтарды тез анықтауға мүмкіндік беретінін және нөмірлерді жасыру әрекеттері жауапкершілікті күшейтетінін еске салады.
Ақпарат көзі : https://www.gov.kz/memleket/entities/mvd-akmola/press/news/details/1222664?lang=kk
Жауап қалдыру