Қарағандыда Қазақстан сәулетшілер одағының 90 жылдығына арналған «Үш ұрпақ сәулеті» атты көшпелі көрме ашылды. Экспозицияда ел сәулетінің қалыптасу кезеңдерін бейнелейтін тарихи фотосуреттер, архивтік материалдар мен заманауи жобалар ұсынылды.
Көрме алғашқы қала құрылысы шешімдерінен бастап бүгінгі қалалық ортаны қалыптастыру тәсілдеріне дейінгі отандық сәулет өнерінің даму шежіресін паш етеді.
Көрмеге сәулетшілер, бейінді жоғары оқу орындарының оқытушылары, студенттер, халықаралық кәсіби қауымдастық өкілдері мен сала ардагерлері қатысты.
Қарағанды облысы әкімінің бірінші орынбасары Азамат Тайжанов Сәулетшілер одағының мерейтойы тек мамандық тарихын ғана емес, қазақстандық қалалардың болашағын да талқылауға мүмкіндік беретінін атап өтті.
— Бүгінде сәулетшілердің алдында жайлы қалалық орта қалыптастыру, тарихи мұраны сақтау және заманауи технологияларды енгізу міндеті тұр. Мұндай жобалар кәсіби диалог алаңына айналып, жас мамандардың аға буынның тәжірибесін меңгеруіне ықпал етуі маңызды, — деді Азамат Тайжанов.
Көрменің негізгі бөлімдерінің бірі қарағандылық сәулетші, педагог әрі суретші Сергей Лебедевті еске алуға арналды.
Келушілерге оның акварельдік туындылары, медиажобалары мен зерттеу материалдары, сондай-ақ әріптестері мен шәкірттерінің еңбектері ұсынылды.
Қазақстан сәулетшілер одағының президенті Ғабит Садырбаевтың айтуынша, «Үш ұрпақ сәулеті» атауы мамандықтағы ұрпақ сабақтастығын білдіреді.
— Қазақстандық отбасыларда көбіне үш буын бірге өмір сүреді, сол арқылы дәстүр мен өмірлік тәжірибе жалғасады. Бұл қағида сәулет саласы үшін де маңызды: жас мамандар уақыт байланысы мен кәсіби мектепті сақтай отырып, шеберлерден үйренуі тиіс, — деді Ғабит Садырбаев.
Көрме қарағандылықтардың үлкен қызығушылығын тудырып, келушілерге лық толы болды.
Ақпарат көзі : https://www.gov.kz/memleket/entities/karaganda/press/news/details/1228792?lang=ru
Жауап қалдыру