Қарағанды облысында жастарға жыл сайын берілетін «Тәуелсіздік ұрпақтары» гранттары табысталды. Мемлекеттік қолдау бизнес, волонтерлік, мәдениет, ғылым және технология салаларындағы жобаларды жүзеге асыруға мүмкіндік береді. Грант иегерлерінің қатарында жаяу туризмді дамыту, балалардың волонтерлік денсаулық клубын құру және отбасылық сүт шаруашылығын өркендетуге бағытталған бастамалардың авторлары бар.
«Тәуелсіздік ұрпақтары» гранттары өз жобаларын дамытып, өңірдің қоғамдық өміріне үлес қосуға ниетті жастарды қолдауға бағытталған.
Грант иегерлерінің бірі – Әйгерім Аймақова. Оның «Туған өлкені жаяу аралайық» жобасы жаяу туризмді дамытуға, сондай-ақ өңір мен елдің тарихи және мәдени мұрасын насихаттауға бағытталған.
Айгерім спорттық туризммен 15 жылдан астам уақыт бойы айналысып келеді. Оның айтуынша, жоба идеясы тарихпен және көрікті жерлермен танысуды барынша жандандырып, көпшілікке қолжетімді ету ниетінен туындаған.
— Біз әсем жерлерге, мұражайларға жиі барамыз. Белсенді демалысты ұнататын, тарихқа қызығатын адамдармен осыны бөліскім келді. Сондай-ақ балалардың бойына тарихқа деген сүйіспеншілікті қалыптастырғым келеді. Мектептегі сабақ – бір бөлек, ал өзің барып, көріп, тарихқа өз қолыңмен қол тигізу – мүлде басқа әсер, – деді Әйгерім Аймақова.
Жоба аясында табиғи көрікті жерлерге, тарихи орындар мен мұражайларға экскурсиялар және белсенді бағыттар ұйымдастыру жоспарланған. Оған әртүрлі жастағы адамдар қатыса алады. Бағдарлама дайын, ал жоба авторы оны жақын арада жүзеге асыруға кіріспек.
Волонтерлік бағыттағы грантты Балқаш қаласының тұрғыны Данагүл Кәрібайқызы иеленді. Оның «Қимылда!» жобасы балаларға арналған әлеуметтік волонтерлік денсаулық клубын құруды көздейді.
Данагүл – хореограф, көп жылдан бері балаларға би үйретіп келеді. Оның айтуынша, жоба оқушылардың көбірек қимылдауына, араласуына және бос уақытын денсаулыққа пайдалы өткізуіне ықпал етуді мақсат етеді.
— Қазір балалар гаджет алдында көп уақыт өткізеді. Сондықтан би арқылы олардың денсаулығын жақсартқым келеді. Бос уақытында олар сабаққа келіп, қимылдап, бір-бірімен араласа алады. Өзім Балқашта ұзақ жылдар бойы би пәнінен сабақ бердім. Уақыт өте келе жеке студиямды ашу туралы ой пайда болды, – деді Данагүл Кәрібайқызы.
Тағы бір грант иегері – Абай ауданының Агрогородок кентінде отбасылық шаруашылықты дамытып отырған Баяман Төлегенов. Кәсіпкер сүт өнімдерін өндірумен айналысады және өнім түрлерін көбейтіп, өндіріс көлемін арттыруды жоспарлап отыр.
Баяманның айтуынша, алынған грант шаруашылықты дамытуға, соның ішінде шөп пен жем-шөп сатып алуға қосымша қаражат бағыттауға мүмкіндік береді.
— Грант – өз ісін ашуға да, өндірісті кеңейтуге де мемлекет тарапынан көрсетілетін өте жақсы қолдау. Бізде тұрақты шығындардың бірі – шөп пен жем-шөп сатып алу. Енді қажетті көлемді еркін сатып ала аламын. Болашақта үлкен ферма ашып, шаруашылықты 200–300 басқа дейін кеңейткіміз келеді, – деді Баяман Төлегенов.
Жобада әлеуметтік бағытқа да ерекше мән берілген. Отбасы ай сайын мүмкіндігі шектеулі балалар мен аз қамтылған отбасыларға шамамен 30 литр сүт тегін береді.
Ақпарат көзі : https://www.gov.kz/memleket/entities/karaganda/press/news/details/1278357?lang=ru
Жауап қалдыру