«Түркі әлемінің тотемі»: Маңғыстауда халықаралық ғылыми-тәжірибелік конференция өтті

«Адай ата – Отпан тау» тарихи-мәдени кешенінде «Түркі әлемінің тотемі» атты халықаралық ғылыми-тәжірибелік конференция өтті. Халықаралық шара «Ақтау – Түркі әлемінің мәдени астанасы» жобасы аясында ұйымдастырылды,- деп хабарлайды Қоғамдық коммуникация орталығы.

Жиын барысында қонақтар халықаралық ғылыми-тәжірибелік конференциясына және секциялық, пленарлық отырыстарға қатысып, Адай ата кесенесіне экскурсия жасады. Шара барысында Маңғыстау облысы әкімінің орынбасары Тілеген Әбішев облыс әкімі Нұрдәулет Қилыбайдың құттықтауын жеткізіп, конференцияны ашып берді.

-Конференцияда талқыланып отырған тақырып түбі бір түркі елдері үшін маңызды. Көкбөрі – түркілердің арғы тегі, қорғаушысы, жол көрсетушісі ретінде тарихи жадымызға, санамызға сіңген ақиқатқа бергісіз анық. Тұранға ортақ үнсіз ұранымыз. Көкбөрі – Түркілердің рухани әлеміндегі еркіндіктің, батырлықтың, даналық пен ұлт бірлігінің символына айналғаны соншалық, мінез бен ақыл – айла және әрекетті бейнелейтін тұрақты сөз тіркестеріне де еніп кеткен, халықтың ереже секілді ұлттың жадына қалыптасып қалған, – деді Тілеген Әбішев.

Сондай-ақ, ашық аспан астындағы ақшаңқан үйлер қалашығында этнографиялық көріністерді тамашалады. Сүбелі ойлар мен пайымдар ортақ талқыға түсіп, тарихи-рухани маңызы зор басқосу өз мәресіне жетті.

-Мұндай іс-шараның өтуі түркі әлемінің мәдени және рухани мұрасын сақтау мен дамытуға, сондай-ақ халықаралық байланыстарды нығайтуға зор үлес қосатыны сөзсіз. «Ақтау –Түркі әлемінің мәдени астанасы – 2025» аясында өлкемізде көптеген ауқымды мәдени-рухани іс-шаралар өтті. Ұлы дала төсінде ұлы түрік өркениетінің іздері сайрап жатыр. Бүгінгі жиында біршама тарихи деректер талқыланды. Көкбөрі символының түркілік және әлем философиясындағы орны бөлек. Бүгін міне көкбөрі тотемі – түркі халықтарының ортақ символы атанды десек болады, – деді ақын, ҚР Жазушылар Одағының мүшесі, «Адай ата – Отпан тау» тарихи-мәдени кешені идеясының авторы Сабыр Адай.