Солтүстік Қазақстанда жылы маусым басталды, бұл кезеңде жоғары сынып оқушыларының көбі уақытын көшеде өткізеді. Осыған байланысты полицейлер «Мото-вело-СИМ» кешенді акциясы аясында жол-көлік оқиғаларының алдын алу жұмыстарын жүргізуде.
Іс-шараның алғашқы кезеңінде, 7 сәуір күні, тәртіп сақшылары Петропавл қаласындағы барлық мектептерде жоғары сынып оқушыларымен кездесіп, мопедтерді, велосипедтерді және жеке қозғалыс құралдарын — электр самокаттарды қауіпсіз пайдалану ережелерін түсіндірді.
Көрнекілік үшін полицейлер Тәуелсіз Мемлекеттер Достастығына кіретін әртүрлі қалаларда болған жол апаттарының бейнежазбаларын көрсетті. Сонымен қатар СИМ пайдаланушылардың негізгі қателіктерін талдады: жылдамдықты асыру, мұқиятсыздық, жол жағдайын дұрыс бағаламау. Бұған құлаққап тағу мен капюшонды төмен түсіріп кию де әсер ететіні атап өтілді. Түсіндіру жұмыстарына жас жол инспекторлары да қатысты.
Келесі күні полицейлер оқушылардың ата-аналарымен кездесті. Оларға велосипедпен жолдың жүру бөлігінде тек 14 жастан бастап жүруге болатыны, мопедті 16 жастан бастап жүргізуге рұқсат етілетіні, ал оны басқару үшін А1, А немесе В санатындағы жүргізуші куәлігі қажет екені түсіндірілді. Мопед міндетті түрде тіркеуден өтуі тиіс. Электр самокатпен жолдың жүру бөлігіне тек 18 жастан бастап және кез келген санаттағы жүргізуші куәлігі болған жағдайда ғана шығуға болады. Барлық жағдайда жол қозғалысы қағидаларын сақтау, шлемдер мен қорғаныс құралдарын пайдалану міндетті.
Үш айда СҚО-да 14–18 жас аралығындағы екі жасөспірім қаза тауып, тағы бесеуі жарақат алды. Полицейлер балалар мен ата-аналарды қырағылық танытып, жол қозғалысы қағидаларын қатаң сақтауға шақырады.
Ақпарат көзі : https://www.gov.kz/memleket/entities/mvd-sko/press/news/details/1198856?lang=kk
Жауап қалдыру