Жетісу облысында өскелең ұрпақ арасында құқықтық мәдениетті қалыптастыру бағытында маңызды қадам жасалды. Талдықорған қаласындағы №28 мектепте заң негіздері, қоғамдық тәртіп және жол қозғалысы ережелері бойынша онлайн-тестілеу өтті.
Оқушылар арнайы QR-код арқылы өтіп, жоба аясындағы тексеруге қатысты. Мұндай заманауи формат көп оқушыны қамтуға мүмкіндік беріп қана қоймай, оқу үдерісін қолжетімді әрі интерактивті етті.
Іс-шара барысында қатысушылар алдында Қоғамдық қауіпсіздік басқармасы бастығының орынбасары Аида Бельгибаева сөз сөйледі. Ол өз сөзінде құқықтық тәрбиенің ерте жастан басталуының маңызын атап өтіп, заңды сақтау – міндет емес, қауіпсіз қоғамның негізі екенін жеткізді.
Тестілеуден кейін оқушылармен профилактикалық жұмыс жүргізілді: полиция қызметкерлері заңнама талаптарын жан-жақты түсіндіріп, жиі кездесетін құқық бұзушылықтарды талдап, оқушылардың сұрақтарына жауап берді. Мұндай ашық диалог балалардың білімін бекітіп, өз әрекеттеріне жауапкершілікпен қарауын қалыптастыруға ықпал етті.
Ақпарат көзі : https://www.gov.kz/memleket/entities/mvd-zhetysu/press/news/details/1212696?lang=kk
Жауап қалдыру