ТҮРКІСТАН: ҚАЗЫҒҰРТТА «IT JAS IQ» АТТЫ ОБЛЫСТЫҚ РОБОТОТЕХНИКА БАЙҚАУЫ ӨТТІ

Түркістан облысы қоғамдық даму басқармасының «Жастар ресурстық орталығы» КММ-нің ұйымдастыруымен Қазығұрт ауданы әкімдігінің қолдауымен облыстық «IT Jas IQ» робототехника байқауы өтті.

Байқауға өңірдің жалпы және мамандандырылған білім беру ұйымдарынан келген 8–11 сынып оқушылары қатысып, өзара бақ сынады. Іс-шараның басты мақсаты – оқушылардың инженерлік ойлау қабілетін дамыту, робототехника мен бағдарламалау саласына қызығушылығын арттыру және шығармашылық әлеуетін шыңдау.

Іс-шараның ашылу салтанатына ҚР Мәдениет және ақпарат министрлігі Жастар және отбасы істері комитетінің басқарма басшысы Мансия Есекеева, Қазығұрт ауданы әкімінің орынбасары Мақсат Беркінбай, сондай-ақ Түркістан облысы қоғамдық даму басқармасы «Жастар ресурстық орталығы» КММ-нің басшысы Ернар Бектаев қатысып, қатысушыларға сәттілік тіледі.

Байқау FIRST LEGO League Challenge «UNEARTHED» тақырыбы аясында өткізіліп, қатысушылар мұхиттарды зерттеу, экология және археология бағытында тың идеялар мен инновациялық жобаларын ұсынды.

Жарыс барысында қатысушылар 4 кезең бойынша сынға түсті. Атап айтсақ, инновациялық жобаларын қорғады, роботтар ойынында 15 миссияны орындады, робот дизайнын таныстырды және командалық негізгі құндылықтарын көрсетті.

Командалар өздерінің жоғары дайындықтарын көрсетіп, роботтарды құрастыру мен бағдарламалау бойынша ерекше шеберліктерін дәлелдеді. Нәтижесінде І орын Қазығұрт ауданы, Qazygurt командасына бұйырды. ІІ орындя Шардара ауданы, Shardara Daryn командасы иеленсе, ІІІ орын Қазығұрт ауданы, Sunkar Q командасына табысталды. Ал IV орынды Созақ ауданы, RoboSozak командасы еншіледі.

Бұл байқау жас өнертапқыштардың жаңа мүмкіндіктерін ашып, техникалық білім мен инновацияға деген қызығушылығын арттыруға зор ықпал етті. Сонымен қатар қатысушыларға тәжірибе алмасуға және өзара байланыс орнатуға мүмкіндік берді.

Түркістан облысы әкімінің баспасөз қызметі