Астанада Отан қорғаушылар күніне орай өткен «Ерлік ырғағы» шеруі елдік рухты ерекше форматта жеткізді, жүздеген барабаншы мен мажоретка көшеде синхронды өнер көрсетіп, қала ортасын нағыз әскери парад атмосферасына бөледі. Музыка мен саптық үйлесім ұштасқан бұл ауқымды іс-шара мерекенің басты көріністерінің біріне айналды, деп хабарлайды елорда әкімдігінің ресми сайты.
Көпшілік назарын аударған шеруде барабан дауысы мен саптық қимыл үйлесіп, орталық алаң бір сәтке әскери парадтың атмосферасына енгендей болды. Іс-шараға Оқушылар сарайының барабаншы қыздары мен мажореткалары қатысты. Олар бірнеше музыкалық композиция орындап, күрделі саптық элементтер көрсетті. Әсіресе барабан үніне дәл түскен қимылдар мен синхронды қойылым көрерменнің ыстық ықыласына бөленді.
Мерекелік шеруге Сағадат Нұрмағамбетов атындағы республикалық «Жас ұлан» мектебінің барабаншылары да арнайы қатысты. Әскери тәртіпке сай дайындалған жас ұландардың жүрісі мен орындау мәнері шараның салтанатын арттыра түсті.
Сонымен бірге Астана қаласы Қылмыстық-атқару жүйесі департаментінің ерлер хоры патриоттық ән орындап, көрерменге ерекше әсер сыйлады.
Шеру соңында мерекелік концерт ұйымдастырылды. Сахнада патриоттық әндер шырқалып, шығармашылық ұжымдар өнер көрсетті. Іс-шара барысында елдік рух, тәртіп пен бірлік тақырыбы кеңінен көрініс тапты. Мұндай шаралар соңғы жылдары елордада жиі өте бастады. Ұйымдастырушылардың айтуынша, негізгі мақсат – жастардың бойында Отанға деген құрметті күшейтіп, ұлттық құндылықтарды дәріптеу. Астана тұрғындары мен қала қонақтары кешке дейін алаңнан тарқамай, мерекелік бағдарламаны тамашалады. Концерттік бағдарлама барысында Қазақстан, Отан, ерлік пен бірлік тақырыбындағы шығармалар шырқалды. Сахнада жас өнерпаздармен қатар тәжірибелі шығармашылық ұжымдар да өнер көрсетті.
йымдастырушылардың айтуынша, мұндай шаралар жастардың әскери-патриоттық тәрбиесіне оң әсер етеді.Соңғы жылдары Астанада әскери-патриоттық бағыттағы мәдени шараларға қызығушылық артқан. Әсіресе мектеп оқушылары мен студенттердің қатысуымен өтетін шерулер мен флешмобтар әлеуметтік желіде жиі трендке шығып жүр. Бұл жолғы барабаншылар шеруі де қала тұрғындарының назарын аударып, мерекелік күннің басты оқиғаларының біріне айналды.
Ақпарат көзі : https://www.gov.kz/memleket/entities/astana/press/news/details/1215179?lang=kk
Жауап қалдыру