25 мамыр күні салтанатты жиындардан кейін қала көшелеріне патрульдік полиция қызметкерлері, ювеналдық полицейлер, учаскелік инспекторлар және облыстық ведомство аппаратының қосымша күштері шықты. Петропавлда қызметке кірісер алдында полиция департаменті бастығының орынбасары Марат Жұмалиев пен қоғамдық қауіпсіздік басқармасының бастығы Әлібек Ғабдуллин жеке құрамға арнайы нұсқау берді: басты мақсат — айыппұл салу емес, балалардың қауіпсіздігін қамтамасыз ету, «Заң мен Тәртіп» қағидатын нығайту және төтенше жағдайларда адамдарға көмек көрсету.
Жағдай кешенді түрде бақылауда болды: көшелерде патрульдер жұмыс істеді, жедел басқару орталығының бейнекамералары пайдаланылды, сондай-ақ орталық саябақ пен қаланың басты жаяу жүргіншілер көшесі үстінде дрон — ұшқышсыз ұшу аппараты қызмет атқарды. Кәмелетке толмағандарға қатысты өрескел құқық бұзушылықтар тіркелген жоқ.
Дегенмен, жасөспірімдердің түнгі уақытта ересектердің қарауынсыз көшеде жүруінің үш фактісі, құқыққа қарсы әрекет туралы хабарламау және кәмелетке толмағанның қоғамдық орында мас күйде болуының бір дерегі анықталды. Әрбір жағдай бойынша әкімшілік материалдар толтырылып, балалармен және ата-аналармен профилактикалық әңгімелер жүргізілді.
Бұл бір реттік акция емес. Жыл басынан бері облыста 500-ден астам рейд өткізіліп, балалардың түнгі уақытта ересектерсіз жүруінің мыңнан астам фактісі анықталды. 620 ата-ана жауапкершілікке тартылды. «Жасөспірім» және «Каникул» жедел-профилактикалық іс-шаралары өткізілді, мектептер мен колледждерде 1700-ге жуық профилактикалық кездесу ұйымдастырылды.
Алда — жазғы демалыс. Балалар көшеде көбірек уақыт өткізеді. Полицейлер ата-аналардан балалармен жолдағы және су маңындағы қауіпсіздік туралы сөйлесіп, сағат 23:00-ден кейін кәмелетке толмағандардың ересектердің қарауынсыз көшеде жүруіне заңмен тыйым салынғанын еске салуды сұрайды. Полицияда балалардың қауіпсіздігін қамтамасыз ету бойынша жазғы кезеңге арналған арнайы жоспарлар әзірленген.
Ақпарат көзі : https://www.gov.kz/memleket/entities/mvd-sko/press/news/details/1229001?lang=ru
Жауап қалдыру