Көкшетау қаласының полиция басқармасына қарт әйел өзінің банктік шотынан ақша ұрланғаны туралы өтінішпен жүгінді. Залалдың жалпы сомасы 3,1 миллион теңгені құрады.
Ұрлық фактісі бойынша сотқа дейінгі тергеу басталды.
Полицейлердің алдын ала нұсқасына сәйкес, зейнеткер бірнеше ай бойы зейнетақы төлемдерін алмаған. Оның телефоны батырмалы болғандықтан, ол мобильді банктік қосымшаны орнатуда көмек сұрап, қызмет көрсету орталықтарының біріне жүгінді.
Полиция алаяқтық жасады деп күдіктелген ер адамды анықтады. Полицейлердің айтуынша, зейнеткердің сенімін пайдаланған ол оның банктік қосымшасына қол жеткізіп, депозиттегі ақшаны көрген. Болжам бойынша күдікті ақшаның бір бөлігін үшінші тұлғаларға аударып, сондай-ақ зейнеткердің атына несие ресімдеген, қаражатты өз керегіне жұмсаған.
Бұл туралы зейнеткер банк бөлімшесіне хабарласқаннан кейін білді, ондағылар оған шотта ақшаның жоқ екендігі туралы хабарлап, полицияға жүгінуге кеңес берді.
Қазіргі уақытта сотқа дейінгі тергеу жүргізілуде. Болған оқиғаның барлық жағдайлары белгілену үстінде.
Полицейлер азаматтарды қаржылық қауіпсіздік шараларын сақтауға шақырады. Мобильді банктік қосымшаларға, дербес деректерге, парольдерге және растау кодтарына қол жеткізуді бөгде адамдарға бермеуге кеңес беріледі.
Ақпарат көзі : https://www.gov.kz/memleket/entities/mvd-akmola/press/news/details/1250620?lang=ru
Жауап қалдыру