Найроби, 2026 жылғы 17 шілде – Кения Президенті У. Рутоның 2026 жылғы мамырдағы Қазақстанға мемлекеттік сапарынан кейін қол жеткізілген уағдаластықтарды іске асыру мақсатында ү.ж. 14-17 шілдеде «Тау-Кен Самұрық» ҰТК» АҚ, «Самұрық-Қазына Инвест» ЖШС, «Кедентранссервис» АҚ және «Фридом Банк Қазақстан» АҚ өкілдерінен тұратын ҚР делегациясының Кенияға сапары ұйымдастырылды.
Сапар барысында қазақстандық делегация мүшелері Кенияның мемлекеттік және жеке сектор өкілдерімен, соның ішінде Инвестициялар, сауда және өнеркәсіп министрі Л.Киньянжуи, Тау-кен министрінің орынбасары Г.Кимтай, Кения Орталық банкінің төрағасы К.Тугге, Найроби халықаралық қаржы орталығының бас директоры Д.Майнда, Equity Bank бас директоры П.Игате, Kenya Airlines бас директоры Дж.Камал, Кения Ұлттық сауда-өнеркәсіп палатасының вице-президенті М.Рамадан және Кения теміржол корпорациясының бас директоры Ф.Майнамен кездесулер өткізілді.
Жоғарыда аталған кездесулер барысында тау-кен, банк ісі, көлік, туризм, инвестиция және ауыл шаруашылығы салаларындағы екіжақты ынтымақтастықты нығайтуға қатысты мәселелер егжей-тегжейлі талқыланып, өзара тиімді бірлескен кәсіпорындарды ашу және қазақстандық өнімдерді Кения нарығына енгізу мүмкіндіктері қарастырылды.
Сонымен қатар, ҚР делегациясы үшін Кенияның Момбаса теңіз портына, болу елінің негізгі құрғақ порты «Найроби ішкі контейнер терминалына», шай және кофе плантацияларына сапарлар ұйымдастырылып, олардың барысында У.Рутоның Қазақстанға сапарынан кейін қол жеткізілген уағдаластықтарды, атап айтқанда, шай және кофе хабын құру мен қазақстандық тараптың Кения порттарын пайдалануы туралы келісімдерді іске асыру мәселесіне ерекше назар аударылды.
Кенияның жоғары лауазымды шенеуніктері Қазақстанның әртүрлі экономикалық салалардағы дамуын жоғары бағалап, Қазақстанмен деген достық қарым-қатынасын ескеріп, ең жоғары деңгейде қол жеткізілген келісімдерді жүзеге асыруға Найробидің дайындығын және Астанамен екіжақты ынтымақтастықты одан әрі кеңейтуге деген терең қызығушылығын атады.
Кездесулерден кейін тараптар екіжақты өзара іс-қимылдың барлық спектрі бойынша, атап айтқанда тау-кен өнеркәсібі, транзиттік және көлік бағыттары, соның ішінде Кения порттарын пайдалану, өзара қызығушылық тудыратын салалар бойынша техникалық-экономикалық негіздемелерді дайындау, ең жоғары деңгейде қол жеткізілген келісімдерді іске асыру бойынша жол карталарын әзірлеу және екіжақты ынтымақтастықты кеңейту жолдарын жан-жақты зерттеу үшін сарапшылар деңгейінде сапарлармен алмасу туралы уағдаластыққа қол жеткізілді.
Ақпарат көзі : https://www.gov.kz/memleket/entities/mfa-nairobi/press/news/details/1260099?lang=ru
Жауап қалдыру