Шығыс Қазақстан облысында әкімшілік рақымшылықтың қорытындысы шығарылды
Өңірлік коммуникациялар қызметінде өткен брифингте Шығыс Қазақстан облысы Полиция департаментінің өкілдері Қазақстан Республикасы Конституциясының қабылдануына байланысты жарияланған рақымшылық туралы заңның іске асырылу қорытындыларын таныстырды.
Заңның жүзеге асырылу нәтижелері туралы ШҚО ПД Әкімшілік полиция басқармасы бастығының орынбасары, полиция полковнигі Игорь Клишин және Қоғамдық қауіпсіздік басқармасы бастығының орынбасары, полиция майоры Нұрлан Жарлығақов баяндады.
Рақымшылық аясында облыста 32 мыңнан астам азамат әкімшілік жауаптылықтан босатылды. Жалпы сомасы 880 миллион теңгеге жуық айыппұл бойынша 60 мыңнан астам әкімшілік іс жүргізу тоқтатылды.
Рақымшылық 280 әкімшілік құқық бұзушылық құрамына, оның ішінде ішкі істер органдарының құзыретіне жататын 58 құқық бұзушылық құрамына қолданылды. Олардың қатарында жол жүрісі қағидаларын және қоғамдық тәртіпті өрескел бұзуға жатпайтын құқық бұзушылықтар бар.
Заң толықтай цифрлық форматта, Әкімшілік іс жүргізудің бірыңғай тізілімі арқылы жүзеге асырылды. Азаматтардан өтініш беру немесе қандай да бір құжаттарды жинау талап етілген жоқ. Сонымен қатар жеке сот орындаушыларының атқарушылық іс жүргізулері тоқтатылып, қойылған шектеулер алынып тасталды және ұсталған көлік құралдары иелеріне қайтарылды.
Брифинг барысында рақымшылықтың бір реттік ізгілік шарасы екені атап өтілді. Алдағы уақытта әкімшілік құқық бұзушылықтарға жол берген азаматтар қолданыстағы заңнамаға сәйкес жауапкершілікке тартылады.
ШҚО ПД баспасөз қызметі
Ақпарат көзі : https://www.gov.kz/memleket/entities/mvd-vko/press/news/details/1265562?lang=ru
Жауап қалдыру