Кейде полиция қызметінің шынайы мәнін ресми есептерден емес, адамдардың алғысы мен өмірде болған қарапайым оқиғалардан аңғаруға болады.
Жетісу облысындағы қарқынды қозғалыс жүретін автожолдардың бірінде кешкі уақытта ішінде отбасы мүшелері отырған жеңіл көлік кенеттен істен шығып, жолдың бойында тоқтап қалған. Мұндай жағдай көлік ішіндегілерге ғана емес, өзге де жол қозғалысына қатысушыларға қауіп төндірген.
Осы сәтте жақын маңда патрульдік полиция экипажы кезекшілікте болған. Тәртіп сақшылары дереу оқиға орнына келіп, жол қозғалысының қауіпсіздігін қамтамасыз етті. Сонымен қатар көліктегі техникалық ақауды қалпына келтіруге көмектесіп, отбасының сапарын қауіпсіз жалғастыруына қолдау көрсетті.
Полицейлердің жанашырлығы мен жедел әрекетіне риза болған азамат әлеуметтік желідегі парақшасында алғысын білдіріп: “Мамандықтың шынайы құндылығы заңды орындаумен ғана емес, адамгершілікпен өлшенеді”, – деп жазды.
Мұндай оқиғалар полиция қызметінің қоғамдық тәртіпті қамтамасыз етумен ғана шектелмейтінін көрсетеді. Тәртіп сақшылары күнделікті қызмет барысында қиын жағдайға тап болған азаматтарға дер кезінде көмек көрсетіп, олардың қауіпсіздігін қамтамасыз етуге әрдайым дайын.
Әрбір патрульдің артында өз қызметін азаматтық парызы деп білетін жандар тұр. Кейде дәл осындай қарапайым игі іс адамдардың бойында полицияға деген сенім мен құрметті нығайтып, үлкен алғысқа себеп болады.
Ақпарат көзі : https://www.gov.kz/memleket/entities/qriim/press/news/details/1270043?lang=ru
Жауап қалдыру