Қостанай облысы Қарабалық аудандық Санитариялық-эпидемиологиялық бақылау Басқармасы туберкулездің алдын алу және оны ерте анықтау әрбір азаматтың денсаулығын қорғауда ерекше маңызға ие екенін еске салады.
Туберкулез – туберкулез микобактериясы (Кох таяқшасы) қоздыратын жұқпалы ауру. Көбіне өкпені зақымдайды, алайда инфекция бүйрек, сүйек, ми және басқа да ағзаларды зақымдауы мүмкін.
Аурудың бастапқы кезеңінде ешқандай белгілер байқалмауы ықтимал. Сондықтан профилактикалық тексерулерден уақытылы өту аса маңызды. Туберкулезге тән негізгі белгілерге ұзаққа созылған жөтел, кеуде қуысының ауыруы, әлсіздік, тез шаршағыштық, дене салмағының төмендеуі, дене қызуының көтерілуі және түнгі тершеңдік жатады. Осындай белгілер байқалған жағдайда дереу дәрігердің көмегіне жүгіну қажет.
Туберкулездің алдын алудағы ең тиімді тәсілдердің бірі – БЦЖ вакцинациясы. Бұл екпе Қазақстан Республикасының Ұлттық профилактикалық егу күнтізбесіне енгізілген. Вакцина жаңа туған нәрестелерге өмірінің 2–4 тәулігінде медициналық тексеруден кейін, қарсы көрсетілімдер болмаған жағдайда жүргізіледі.
Туберкулезді ерте анықтауда флюорографиялық тексерудің маңызы зор. Өкпені флюорографиялық тексеру 15 жастан бастап жылына кемінде бір рет тұрғылықты жері немесе тіркелген емханасы бойынша тегін жүргізіледі.
Уақтылы вакцина алу, профилактикалық медициналық тексерулерден тұрақты өту және денсаулыққа жауапкершілікпен қарау туберкулезді ерте кезеңде анықтауға, дер кезінде емдеуді бастауға және инфекцияның таралуының алдын алуға мүмкіндік береді.
Ақпарат көзі : https://www.gov.kz/memleket/entities/kostanai-karabalyk-audany-akimat/press/news/details/1273898?lang=ru
Жауап қалдыру