ТҮРКІСТАН: ТҮЛКІБАСТА ҒАСЫРҒА ЖУЫҚ ТАРИХИ БАР МЕКТЕПТІҢ ЖАҢА ҒИМАРАТЫ ПАЙДАЛАНУҒА БЕРІЛДІ

Бүгін Түркістан облысы Түлкібас ауданы Майлыкент ауылдық округіне қарасты Қараағашты ауылында орналасқан Дауан атындағы жалпы білім беретін мектебінің 150 орындық заманауи қосымша ғимараты пайдалануға берілді. Салтанатты шараға аудан әкімі Асқар Естібаев, білім саласының ардагерлері, ауыл ақсақалдары, мектеп ұжымы, ата-аналар мен ауыл тұрғындары қатысты.

Жиын барысында аудан әкімі Асқар Естібаев ұстаздар мен оқушыларды Білім күнімен құттықтап, білім мен тәрбие мәселесінің маңыздылығына тоқталды.

– Білім беру – тек пәндік біліммен шектелмейді. Мектептің басты міндеті – білімді, заңды құрметтейтін, жауапкершілігі жоғары азамат тәрбиелеу. Мемлекет басшысы Қасым-Жомарт Кемелұлы Тоқаев атап өткендей, ұстаз болу, ұрпақ тәрбиелеу – қасиетті миссия. Сондықтан бүгінгі оқушының білімі мен тәрбиесі – ертеңгі Қазақстанның келбеті, – деген аудан әкімі қазіргі таңда білім саласына қойылатын жаңа міндеттерге тоқталып, цифрлық технологиялар мен жасанды интеллектіні білім беру үдерісіне енгізудің маңызын атап өтті.

Салтанатты жиында аудан әкімі Асқар Естібаев мектеп директорына жаңа ғимараттың кілтін табыстап, ауыл ақсақалдарымен бірге нысанның салтанатты лентасын қиды. Алғашқы қоңырау соғылып, мектеп табалдырығын алғаш аттаған бүлдіршіндер қызыл кілеммен жүріп өтті. Жаңа оқу жылында 1-сыныпқа биыл 31 оқушы қабылданды.

Дауан атындағы мектептің тарихы тереңде жатыр. Білім ордасы 1927 жылы ашылған. Ал негізгі ғимараты 1977 жылы пайдалануға берілген. Ғасырға жуық тарихы бар мектептен талай шәкірт түлеп ұшып, ел дамуына өз үлесін қосып келеді.

Мектеп ұжымының білім саласындағы жетістіктері де жоғары. 2025-2026 оқу жылында білім ордасын 19 оқушы тәмамдады. Олардың 3-еуі «Алтын белгі» иегері атанса, 1 түлек үздік аттестатқа ие болды. 11 түлек мемлекеттік грантқа, 2 оқушы ректорлық грантқа қол жеткізді.

Қазіргі таңда мектепте 46 педагог қызмет атқарады. Жаңа оқу жылында білім ордасы жаңа мүмкіндіктерге жол ашып, шәкірттерге сапалы білім мен саналы тәрбие беруді жалғастырады.