Трансұлттық ұйымдасқан қылмысқа, экстремизм мен терроризмге қарсы іс-қимыл Түркі мемлекеттері ұйымына мүше елдердің ішкі істер министрлерінің Астанада өткен кездесуінде талқыланған негізгі мәселелердің біріне айналды.
Қазіргі таңда қылмыстық топтар бірден бірнеше елдің аумағында әрекет етіп, цифрлық технологияларды пайдаланады, бағыттары мен жасырыну тәсілдерін үнемі өзгертіп отырады. Сондықтан түрлі мемлекеттердің құқық қорғау органдары арасында тікелей өзара іс-қимыл орнату мен ақпарат алмасудың маңызы артып келеді.
Мұндай бірлескен жұмыстың бір мысалы – түркиялық әріптестердің көмегімен Ыстамбұл қаласында Қазақстан азаматының өлтірілуіне қатысты қылмыстың ашылуы.
Министрлер экстремизм мен терроризмге қарсы іс-қимыл мәселесіне де ерекше назар аударды. Жыл басынан бері Қазақстанның ІІМ радикалды көзқарасты ұстанған 145 шетелдік азаматты ұстады және ел аумағынан шығарды.
Халықаралық өзара іс-қимылдың да нақты нәтижелері бар. Қазақстан тарапының сұрауы бойынша әзербайжандық әріптестер Бакуде бірқатар қылмысқа қатысы бар діни радикалды ұстады. Өзбекстанда терроризмді насихаттағаны және ұйымдасқан қылмыстық топқа қатысқаны үшін Қазақстан іздеу жариялаған адам, ал Қырғызстанда әлеуметтік араздықты қоздырғаны үшін іздеуде жүрген азамат ұсталды.
— Бүгінде көптеген қауіп-қатер бір елдің шекарасымен шектелмейді. Сондықтан мұнда қызметтеріміз арасындағы тікелей байланыс пен ақпаратты уақтылы алмасудың маңызы ерекше. Шетелге жасырынуға тырысқан адамдарды жедел анықтап, ұстауға тек бірлескен жұмыс мүмкіндік береді, – деді Қазақстан Республикасының Ішкі істер министрі Ержан Саденов.
Қазақстан тарапы трансұлттық қылмысқа, экстремизм мен терроризмге қарсы іс-қимыл мәселелері бойынша Түркі мемлекеттері ұйымына мүше елдердің тиісті бөлімшелері арасында жедел ақпарат алмасуды және тікелей өзара іс-қимылды күшейтуді ұсынды.
Ақпарат көзі : https://www.gov.kz/memleket/entities/qriim/press/news/details/1289637?lang=ru
Жауап қалдыру