Маңғыстау облысында «Қазақстанда туберкулезді тоқтатайық» ұлттық әріптестігін дамыту және туберкулез ауыртпалығын төмендетуге азаматтық қоғамның қатысуын күшейту жөніндегі адвокациялық кеңес өтті.
Іс-шараға Қазақстанның әр өңірінен денсаулық сақтау саласының, медициналық ұйымдардың, мемлекеттік органдардың және азаматтық қоғам институттарының өкілдері қатысты. Кеңеске онлайн форматта еліміздің түкпір-түкпірінен қатысушылар қосылып, туберкулезге қатысты өзекті мәселелер мен өңірлік тәжірибелерді тыңдады.
Кездесу барысында туберкулездің қоғам денсаулығына әсері, ауруды ерте диагностикалау, халықтың хабардарлығын арттыру, сондай-ақ мемлекеттік органдар, медицина саласы және азаматтық қоғам арасындағы өзара іс-қимылды күшейту мәселелері қаралды.
Қатысушылар өңірлер арасындағы тәжірибе алмасу, азаматтық қоғамның қатысуын кеңейту және мүдделі мемлекеттік құрылымдар мен ұйымдардың бірлескен жұмысын жетілдіру бағыттарын талқылады.
Адвокациялық кеңеске Маңғыстау облысы бойынша Қылмыстық-атқару жүйесі департаментінің медициналық қызметінің өкілдері де қатысты. Департаменттің санитарлық дәрігері, әділет лейтенанты Әсем Мұқашева ведомствоаралық ынтымақтастықтың маңыздылығына тоқталды.
«Туберкулезбен күресте нәтижеге қол жеткізу үшін барлық мүдделі тараптардың үйлесімді жұмысы қажет. Қылмыстық-атқару жүйесі саласында да бұл бағыттағы жұмыстар денсаулық сақтау органдарымен және басқа да мемлекеттік құрылымдармен тығыз байланыста жүзеге асырылады. Ортақ мәселелерді бірлесе талқылап, тәжірибе алмасу және тиімді шешімдерді бірге қалыптастыру маңызды. Осындай өзара іс-қимыл туберкулездің ауыртпалығын төмендетуге өз үлесін қосады», – деді Маңғыстау облысы бойынша Қылмыстық-атқару жүйесі департаментінің санитарлық дәрігері, әділет лейтенанты Әсем Мұқашева.
Кеңес барысында азаматтық қоғамның туберкулез мәселесіне қатысты ақпараттық-түсіндіру жұмыстарына қатысуы, халықтың медициналық сауаттылығын арттыру және әлеуметтік маңызы бар ауруға қатысты стигманы төмендету мәселелеріне де назар аударылды.
Қатысушылар туберкулезбен күрес тек медицина саласының міндеті емес екенін атап өтіп, мемлекеттік органдар, медициналық ұйымдар, азаматтық қоғам және басқа да мүдделі тараптардың бірлескен жұмысының маңызын атап өтті.
Кеңес қорытындысында ведомствоаралық байланысты нығайту, өңірлер арасында тәжірибе алмасуды жалғастыру және азаматтық қоғамның қатысуын кеңейту жөнінде ұсыныстар айтылды.
«Қазақстанда туберкулезді тоқтатайық» ұлттық әріптестігі аясындағы адвокациялық кеңес еліміздің өңірлеріндегі тәжірибені біріктіріп, туберкулез ауыртпалығын төмендетуге бағытталған ортақ тәсілдерді талқылауға мүмкіндік берді.
Ақпарат көзі : https://www.gov.kz/memleket/entities/duis-mangystau/press/news/details/1295738?lang=ru
Жауап қалдыру