Біз күн сайын тыныстап жүрген ауаның сапасына сирек мән береміз. Алайда атмосфералық ауаның жай-күйі адамдардың денсаулығы мен әл-ауқатына тікелей байланысты. Сондықтан ауаның сапасын тұрақты бақылау санитариялық-эпидемиологиялық қызмет жұмысының маңызды бағыттарының бірі болып табылады.
Ақмола облысында санитариялық қызмет елді мекендердегі атмосфералық ауаның жай-күйіне мониторинг жүргізеді. Ауа сынамалары тұрғын үй аумақтарынан, өнеркәсіп кәсіпорындары мен коммуналдық шаруашылық нысандарына жақын жерлерден, сондай-ақ автокөлік қозғалысы қарқынды учаскелерден алынады.
Зерттеулер бекітілген кестеге сәйкес тоқсан сайын жүргізіледі. Зертханаларда ластаушы заттардың мөлшері анықталып, олардың әсер ету деңгейі бағаланады және халық денсаулығына ықтимал қауіптер айқындалады.
2026 жылдың 9 айында санитариялық-эпидемиологиялық қызмет тарапынан атмосфералық ауаға 7847 зерттеу жүргізілді. 220 сынамада ластаушы заттардың шекті жол берілетін концентрациядан асқаны анықталды. Мұндай жағдайлар Атбасар ауданында, сондай-ақ Степногорск және Көкшетау қалаларында тіркелді.
Шекті жол берілетін концентрациядан асып кетудің әрбір фактісі бойынша ақпарат тиісті шаралар қабылдау үшін жергілікті атқарушы органдарға және мүдделі ұйымдарға олардың құзыреті шегінде жолданады.
Таза ауаны сақтау – мемлекеттік органдар мен кәсіпорындардың ғана емес, баршамыздың ортақ міндетіміз. Бұл іске әр адам өз үлесін қоса алады. Қоғамдық көлікті пайдалану, жаяу жүру және велосипедпен жүру автокөліктен шығатын жүктемені азайтуға көмектеседі. Жеке сектор тұрғындары үшін мүмкіндік болған жағдайда сапалы отын түрлеріне көшу, оның ішінде көмірден табиғи газға ауысу маңызды қадам болуы мүмкін.
Ақпарат көзі : https://www.gov.kz/memleket/entities/departament-kkbtu-akmolinsk/press/news/details/1307413?lang=ru
Жауап қалдыру