Еуразиялық экономикалық комиссия Кеңесінің мүшелері 20 мамырда Еуразиялық экономикалық одақтың техникалық регламенттерін іске асыруды қамтамасыз ететін стандарттар тізбелерін әзірлеу және қабылдау тәртібінің жаңа редакциясын мақұлдады.
Шешім халықаралық және өңірлік (мемлекетаралық) стандарттардың тізбелеріне қатысты. Ал олар болмаған жағдайда ЕАЭО техникалық регламенттерінің талаптарын ерікті негізде сақтауды қамтамасыз ететін ұлттық (мемлекеттік) стандарттар қолданылады. Сонымен қатар шешім Одаққа мүше мемлекеттердің халықаралық, өңірлік (мемлекетаралық) және ұлттық (мемлекеттік) стандарттарының тізбелерін, сондай-ақ зерттеулер (сынақтар) мен өлшеулер әдістемелерін қамтиды. Аталған әдістемелерде зерттеулер (сынақтар) мен өлшеулер жүргізу қағидалары мен әдістері, оның ішінде үлгілерді іріктеу қағидалары белгіленген. Олар ЕАЭО техникалық регламенттерінің талаптарын қолдану және орындау, сондай-ақ техникалық реттеу объектілерінің сәйкестігін бағалау үшін қажет.
Аталған тәртіпті ЕЭК Кеңесі 2016 жылы бекіткен болатын.
Тәртіптің жаңа редакциясы оны қолдану тәжірибесін ескере отырып дайындалды және мынадай нормаларды көздейді:
– ЕАЭО техникалық регламенттеріне арналған стандарттар тізбесіне енгізілген, оның ішінде құқық иелері ЕАЭО-ға мүше мемлекеттердің уәкілетті органдары мен ЕЭК болып табылатын әдістемелерді қолдану мүмкіндігі мәселесін реттеу;
– стандарттар тізбелерінің жобаларына және оларға енгізілетін өзгерістерге жүргізілетін метрологиялық сараптама нормаларын оңтайландыру;
– стандарттар тізбелерін өзектендірмей-ақ оларға өзгерістер енгізу мүмкіндігін қамтамасыз ететін тәртіп ережелерін нақтылау.
Сондай-ақ мұндай рәсімдердің мерзімдерін қысқарту мақсатында стандарттар тізбелеріне өзгерістер енгізу жөніндегі ұсыныстарды дайындау рәсімдері түзетілді.
ЕЭК Кеңесінің шешімі ресми жарияланған күннен бастап күнтізбелік 30 күн өткен соң күшіне енеді.
Бизнес қауымдастығы үшін бұл өзгерістер бірқатар практикалық артықшылықтар береді. Атап айтқанда, сынақ әдістемелерін қолдану және олардың мәтіндеріне қол жеткізу мәселелерін реттеу өндірушілер, сынақ зертханалары және сәйкестікті бағалау органдары үшін құқықтық айқындықты арттыруға ықпал етеді.
Өзгерістер стандарттар тізбелерін қалыптастыру рәсімдерінің ашықтығы мен тиімділігін арттыруға бағытталған. Бұл реттеушілік жүктемені азайтуға, нарық қатысушылары үшін құқықтық айқындықты күшейтуге және ЕАЭО аумағында бизнес жүргізу жағдайларын жақсартуға мүмкіндік береді.
Тәртіп жақын арада Еуразиялық экономикалық комиссияның ресми сайтында орналастырылады.
Ақпарат көзі : https://www.gov.kz/memleket/entities/mti-ktrm/press/news/details/1225193?lang=ru
Жауап қалдыру