Қарағандыда WorldSkills Karaganda – 2025 мерейтойлық, оныншы өңірлік чемпионатының қорытындысы шығарылды. Бұл жолы жарысқа облыстың 38 колледжінен 286 талантты студент қатысты. Үздік атану үшін олар 46 құзыреттілік бойынша бақ сынасты: инженерия мен аспаздық, мейрамхана сервисі мен кірпіш қалаудан бағдарламалау мен флористикаға дейін.
Алғаш рет «Жастар» спорт кешенінде орталықтандырылған түрде 20 бағыт бойынша жарыстар өтті, сондай-ақ өңірдің 14 колледжі қалған құзыреттерге арналған мамандандырылған алаңдар ретінде өнер көрсетті.
Сарапшылар чемпионатқа қатысушылардың деңгейі айтарлықтай өскенін, ал оқиғаның өзі жұмысшы мамандықтарының нағыз мерекесіне айналғанын атап өтті.
– Жұмысшы мамандықтар жылында WorldSkills өңірлік кәсіби шеберлік чемпионаттарын өткізу ерекше мәнге ие болып, еңбек, білім мен шеберлік лайықты танылатын, ал жұмысшы мамандықтар жастар арасында құрмет пен танымалдыққа ие болатын алаңға айналады, – деді облыстың білім беруді дамытудың оқу-әдістемелік орталығы басшысының орынбасары Татьяна Нартова.
Барлығы 148 жүлдегер анықталды. Олардың қоржынында 55 алтын, 48 күміс және 45 қола медаль бар. Сондай-ақ, 40 қатысушы кәсіпқойлығы үшін медальға ие болды.
Жеңімпаздар WorldSkills Kazakhstan – 2025 республикалық чемпионатында өңірдің намысын қорғайтын болады.
Жеңімпаздар тізімімен мына жерде танысуға болады.
Ақпарат көзі : https://www.gov.kz/memleket/entities/karaganda/press/news/details/1016126?lang=kk
Жауап қалдыру