Брюссель, 2026 жылғы 11 қыркүйек – Қазақстанның Бельгиядағы Елшілігінде «Қазақстанның жаңа саяси дәуірі: конституциялық реформалар іс жүзінде» тақырыбына арналған «Shanyraq Dialogues» пікірталас алаңының кезекті отырысы өтті. Қатысушылар жаңа конституциялық модельді іске асырудың алғашқы нәтижелерін, саяси институттардың жаңаруын және Қазақстанның одан әрі саяси даму перспективаларын талқылады.
Іс-шараға Бельгия Корольдік сарайының, Еуропалық Одақтың негізгі институттарының, Еуропалық инвестициялық банктің, дипломатиялық корпустың, сондай-ақ сарапшылық, іскерлік және медиа топтардың өкілдері қатысты.
Пікірталасты аша отырып, Қазақстанның Бельгиядағы Елшісі Роман Василенко конституциялық өзгерістердің негізгі қорытындыларын таныстырып, Қазақстан мемлекеттік институттарды одан әрі нығайтуға, қоғамдық диалогты дамытуға және мемлекеттік басқарудың тиімділігін арттыруға бағытталған реформаларды практикалық тұрғыдан іске асырудың жаңа кезеңіне қадам басқанын атап өтті. Осы тұрғыда ол кең ауқымды қоғамдық диалог пен қоғамның түрлі топтарының ұлттық күн тәртібін қалыптастыруға қатысуы үшін қосымша алаңға айналатын Халық Кеңесін алдағы уақытта құрудың маңыздылығына тоқталды.
Елдің экономикалық және технологиялық жаңғыруына, оның ішінде цифрландыруға, жасанды интеллектті, инфрақұрылымды және адами капиталды дамытуға ерекше назар аударылды. Реформалардың халықаралық қырына тоқталған Р.Василенко Қазақстанның егемендік, диалог, бейбітшілік және өзара тиімді ынтымақтастық қағидаттарына бейілділігін атап өтіп, халықаралық серіктестермен, соның ішінде Еуропалық Одақпен өзара іс-қимылды одан әрі тереңдетудің перспективаларына назар аударды.
«EUalive» бас редакторы Георги Готев Құрылтайға алғашқы сайлау өткен кезеңде Қазақстанға жасаған жуырдағы сапарынан алған әсерлерімен бөлісіп, бұл сайлауды елдің саяси дамуындағы маңызды кезең деп атады. Ол сондай-ақ «Shanyraq Dialogues» форматына жоғары баға беріп, оны Қазақстанның Еуропалық Одақпен және Бельгиямен қарқынды дамып келе жатқан қатынастарын толықтыратын бейресми пікірталас алаңы ретінде атап өтті.
«Diplomatic World» басылымының жоба директоры Альберто Тюркстра қазіргі кезеңді Қазақстанның саяси және институционалдық дамуындағы бетбұрысты сәт деп сипаттады. Оның пікірінше, бүгінгі таңда басты мәселе конституциялық реформаның мазмұнында ғана емес, жаңа институттардың іс жүзінде қалай жұмыс істейтініне және олардың айналасында қандай саяси мәдениет қалыптасатынына байланысты.
Сарапшы жаңа бір палаталы Құрылтайдың рөліне ерекше тоқталып, оны саяси жаңғырудың және шешім қабылдау үдерісінің тиімділігін арттырудың негізгі элементтерінің бірі ретінде бағалады. Оның пікірінше, реформалар есептілікке, азаматтардың қатысуына және институционалдық теңгерімге көбірек мән бере отырып, Қазақстанның мемлекеттік институттарын ел дамуының жаңа кезеңіне бейімдеуге деген ұмтылысты көрсетеді.
Сұрақ-жауап сессиясы барысында қатысушылар Қазақстанда жүргізіліп жатқан конституциялық өзгерістерді, іскерлік және инвестициялық ортаның дамуын, сондай-ақ Еуропалық Одақпен және Бельгиямен одан әрі ынтымақтастық перспективаларын талқылады. Жаңа конституциялық институт – Халық Кеңесінің құрылуы ерекше қызығушылық тудырды. Еуропалық серіктестермен өзара іс-қимыл аясында сауда-экономикалық, инвестициялық және басқа да перспективалы салалардағы ынтымақтастықты одан әрі кеңейту мүмкіндіктері атап өтілді.
Қазақстанда жасанды интеллект пен цифрландыруды дамытуға айтарлықтай назар аударылды. Қатысушылар еліміздің осы салада қол жеткізген жетістіктерін және еуропалық серіктестермен өзара тәжірибе алмасу әлеуетін атап өтті. Осы тұрғыда «ақылды қалаларды» дамыту, Алатау қаласының жобасы, сондай-ақ Қазақстанның халықаралық технологиялық бастамалары талқыланды. Еуропалық және бельгиялық серіктестер 2026 жылғы 1–3 қазанда Астанада өтетін AI & Digital Bridge 2026 іс-шарасына қатысуға шақырылды.
Қазақстанда жүзеге асырылып жатқан ауқымды өзгерістерді ескере отырып, қатысушылар ел дамуының ұзақ мерзімді перспективаларына ерекше қызығушылық танытты. Пікір алмасу барысында Қазақстанның Орталық Азия мен Еуропа арасындағы көлік-логистикалық байланыстарды нығайтудағы өсіп келе жатқан рөлі, халықаралық келіспеушіліктерді бейбіт жолмен реттеуге, БҰҰ Жарғысы мен халықаралық құқық қағидаттарына дәйекті бейілділігі, сондай-ақ елдің одан әрі дамуындағы жас ұрпақтың әлеуеті атап өтілді.
Ақпарат көзі : https://www.gov.kz/memleket/entities/mfa-brussels/press/news/details/1290594?lang=ru
Жауап қалдыру